Sabrit

Sa sabrit nagpoon
A saday na kalayo'
Pigtubudan!-lang daling nagwarak
Pirang dignidad a nasulo o natumtom?


Kaya maglikay sa pagsabrit
Ta pag a posporo nakapitik
Sa kogon o laying
A karaba migsunod
Dakul mararaot!!!

Burubuskay

A latigo ka pagsakit
bakrod sa tutulnan
Ita, kamot, ag lalawgon.
Malalatang kanbas ka pagtios
Kulog ag agrangay sa buhay...


Tangad! Tangad!
Abuta a suripot na lalawgon
Tanganing a paglaom
Na tinadtad sa tapalan nin pagsuko
Na nagkasuruway-suway
Mabilog otro.......


Aplosa......
Padalagana a pagtubod
Sa pagrukot ka kamot mo
Sa lalawgon niya.....
Ayat sa kusog boot
kusog sa pagtubod,
na a burubuskay na dara
ka latigo ka pagsakit
Usad na aldao miglupos man
Ag a bakrod mauuda man....
Migkipil man....

Likay kamo…

A maringgaw na kamot
minsan nagugurot…..
A matabil na nguso’
Minsan napapaso…..
A tiil na lang makadayan
Pinipilay man……
A matang dakulo
Pigpaparugo……
Likay kamo
Diri magdagso
Ta kapamasulan
Buko sa unaan…

Pasko daa sa Marso

Pasko sa Marso
An pagtunga kan payong tinutukan sa badil
An payong inilista sa interpol
An payong takrogon asin nagtago sa kadikluman
An payong talawon asin duminulag sa bulangan.

Ta nata dapat makatakot an tawong daing gibong sala?
Ta nata dapat magilumlum an manok na daing itlog
O mag-ilolo an halas na bago an kaliskis?
O maghibernate an palaka kun nag-uuran man?
Ta nata dapat ipreso an sadiri?
O matakot kun dai man dapat na katakotan?


An mga rason baya asin salang kapangyarihan
Makosog na batas ni Hudas asin ni Satanas
Taganing an sala giboon na tama!
Halata mahuhulog ka man impiyerno
Asin sisilyaban an saimong kalag!
Sisilyaban asin tututungon.......

Salamat!

Salamat! patapos na a pagdugkal
narurungog ko na a karagting
nababayad ko na a liwanag
salamat! mati ko na kamuyahan.