Gigis

kasabay kan pagpurutukan....
asin pagkurahaw kan mga picolo, kwitis, sinturon ni hudas, superlolo asin wizzle bomb
an pagragrag kan saiyang gigis......


nagkaribok an mga nakahiling...
an iba namutla na garo naubusan ki dugo...asin di na aram an saindang gigibuhon......

nakigkig man an mga tambay asin nag-iirinuman sa kanto...
asin dali-daling nakiusyuso.....
pero wara na.....wara na an saiyang an saiyang gigis.....
na garo kahoy ng tinigbas asin nautas.....


dali-dali naghapod sa traysikel
tanganinbg agapan na darahon sa ospital o saen man na haraning klinika
tibaad pwede pang idugtong....
pero wara na.....wara na an saiyang gigis...
nawalat na kun saen ....
wasak-wasak na dai na pwedeng maitakod...
gusang -gusang na an tulang....
asin nakaapon na kasabay kan pagralayugan kan mga pulbura asin papel na pamputos sa paputok....
paaram sa gigis na nawara sa perang segundo sana............


Sa sunod na bagong taon magsabrit ka pa.....

Tanog

Sa gab-ing ini nagkaribok an kalangitan!
Nagbaraylihan ang mga gamgam,
Nagrukyaw an mga aninipot
Asin gabos nag-ugma.
Nag-ugma sa tanog na biyong naglalakabog
Sa kudal, sa bintana, sa atop
Palagbas sa mga harong.
An mga burak, an mga kahoy
Asin mga ilaw nag-ugma.
Nagbaraylihan........
Nagdidinurat.........
Nagsusuruludan sa agihan,
Sa kudal, sa atop, palagbas sa mga harong asin kakahuyan.
Naugma an gabos, asin nagbiritnga-an an mga tiil
Asin nagudag-udag
Sa tanog na nalalakabog
Sa kudal, sa bintana, sa atop,
Palagbas sa mga harong asin kakahuyan.
An mga kamot nagralayugan
Kasabay kan paglibong kan mga payo
Na tayong na sa arak asin kamuyahan.
Sa tanog asin ilaw na naglalakabog
Sa kudal, sa bintana, sa atop,
Asin palagbas sa harong asin mga kakahuyan.

Duwang Anino

Kasubagong maagahon
Mantang ako naglalakaw
Paduman sa harong ni Kagurangnan
Nagpahiling sako an duwa kung anino
An saro pawala
An saro patuo
Dai ko aram kun arin sa duwa an sakuyang susunodon
Tutubudon.....
Dadangugon.....
Mantang garo itlog na pulang itinaplak sa kalangitan
Na nagtataong liwanag an bulan
Pero dai man lamang ako pinataniran
Kun arin an sakuyang dapat na sunodon
Tutubudon.....
Dadangugon....
Ipinirong ko an sakuyang mga mata
Asin dinangog an pulso kan sakuyang puso
Asin naglakaw ako sa kadikloman
Daing takot na sinalunngaan raran na madiklomon
Tinulon ko an sakuyang takot
Tinulon ko an gabos na girabo
Tinulon ko an gabos na takot
Asin an duwa kong anino luway-luway na nawara.
Salamat nakaabot ako sa harong ni Kagurangnan.
Salamat naanap ko na an sakuyang sadiri.....

Tigsik

Tigsik ko ading library
Ta nakalock…sirado pirmi
A mga libro uno sirbi?
Irakman kaming estudyante.


Tigsik ko ining bahay-kubo
Ta multi-function hall kuno
Turugan, tambayan, leksyunan
Minsan kaunan ag basurahan.

Tigsik ko ining gwardiya.
Ta mala bagang makasisita
Pero a duwang dakulong mata buta
Ta dakul man nakalulusot baga.


Tigsik ko ining usad na room
Ta a parong gana cologne
Nagparatparat na na baga
Please a CR bubuo na

Tigsik ko ining usad na maestro
Ta a gibo magparapakopya
Una gayud kanamu elementarya
Di ka magreklamo ta uuditan ka.


Tigsik ko ma raw ining soc-sci
Ta a thesis ninra aba ay
Pakocompute..pakorurocompute
Pirmi man sanang lupsot.



Tigsik ko ining iskwelan ta
Ta pag minauran fishpond baga
Kulang na sana tilapia
Ag mga itong basura…

Tigsik ko ining kantina
Ta a tinda ginto baga
Nagmahal-mahal na
Plus nakangurot na tindera.

Jeep na igwang kurtinang lukoy

Haen ka maduman, jeep na igwang kurtinang lukoy?
Ta nata marikas an saimong dalagan
Ano ta ika nagmamadali?
Ano an saimong importanteng lakaw
Ta ika kargadong maray?
Igwang kaldero asin mga kawa
Mga manok asin orig na dakula.
Tambak an saimung lunad na halos dai na makairo.


Jeep na kinurtinahan sa lukoy
Haen ka maduman pwede paiba man?
Anu ta dakulon an saimung karga
Panu-panu an saimung taplod.
Igwang mga babasyaran asin plangana
Mga karatsutso asin tapa.
Siguradong harayo an saimong lakaw
Ta mga nakalunad mo nakadungaw
Ababa pa an aldao
Marikas kang suminungaw.

Mural

Aninong nakaimprenta
Sa kudal na luma ag taklaon na.
Di na maintindihan kun unoy ka!
Disenyo o sad na mantsa?


Isinapoy mo a lumot,
Ginakos ka ko balagon ag gamot
Tuminago ika ta nakatakot!
Kinorona mo mga doot!!


Su gayon mo ko panahon
Dawa usad da na nakarurumrum!
Tabidan na sana sa parainum
Ag wiwigtikan sa sip-on.


Aninong nakaimprenta
Sa kudal na luma ag gatk-gatak!
A lulubngan mo batong tipak-tipak
Na tinamaan kikilat!

jomark m. baynado 12/21/2010

Langit-langitan ka mga Talaod

Sa matubig na uma
O sa makangkong na parte
Pirming sadto sinda.

Bantay sa mga surang matubis
O sa talapang uda kaliskis
A Panrakop ninda tukang matulis.


Sa paglayog ninda oro-aldao
Sa pagtunga o pag nasupog na a aldao
Langit-langitan inaanap.


Minsan sa purongputungan ka mambog
Malaka-sopistikadong nakatindog.
Hade bagang malaka-pusog.


Minsan sa ibabaw ka damulag
Uda andal na matitikrag.
A duwang bugaybo na sa payo nakatingkag.


Minsan sadto langit
Sa mga panganorong lang-akit
Sa patak ka urang malapnit sa kulit.


Usad na aldao
Nagrulopadan sinda
Diri ko aram kun pasari na
Kaya inunga ko!
"Puting bugaybo pasari na kamo?

Simbag ninda "Pasadto---- Pasadto
Pasadto sa langit-langitan ka mga talaod
Na paryo mo......"

jomark m. baynado 12/20/2010

Amamangi

Amamangi sa dahon nin mangga

Paboritong kawatan ni Nena

Suminakat siya duman sa sanga

Kuminalag-kalag,makahiling baga.



Yinugyog niya an puon

Pero an naragrag mga dahon.

Ano daw ta warang amamangi?

(Hapot niya sa saiyang sadiri.)



Si Nena herak man ta naghihibi

Wara kayang nakuang amamangi

An pu-ngaw sa mata niya aldao- banggi

Asin an panahon marikas nang uminagi.



Si Nena ngunian daraga na.

Magayunon na, seksi pa.

Pero kawatang paborito niya

Iyo pa an amamangi sa dahon nin maggga.





Kaya rinegalohan ming amamangi

Anong ugma mi ta ako sinewerte!

Sa amamanging dara mi siya namuya.

Namuya man mi ta nakua ko an puso niya.

Sa Pag-ukro ka Paroy...

Totong na kulit, na kinisan ka aldao

Kamot na malang kalyo, kapot pirming arado.

Kukong tipak-tipak, napungka sa bato.

Kopyang lubot na,mababakalan sa bago!

Sa pag-ukro ka paroy, kamuyahan itinao!





Riyok-riyok na bayong nangangantang uda pondo

Rignos na nakikimuya sa inga ka mudto

Tikling nagkakaribok, kilingkiling na so payo!

Panganorong maputi, sa langit mga laso!

Kawayang nagbabayli sa kanta ka koro-koro!

Sa pag-ukro ka paroy kamuyahan itinao!



Si Inay ag si Manay nagpeprepara ko mga sako.

Nagtatahi ko mga rapak, nagtatapal ko mga lubot ta sayang kuno.

Saludan sa kamuyahan, bulong sa pag-alop ninyo.

Si Nonoy nag-uusay ko mga plato ag nag-uugas ka kaldero

Ta a matimgas na paroy kamuyahang uda pondo.

Sa paukro ka paroy kamuyahan itinao!





jomark m. baynado 12/18/2010

Black Bug

Su paruyan ag so paruy.......
Kinurumtan ka mga black-bug
Mga pakal na bampirang nangsurusupsup
Mga pakpak na mabatang uda erak.

Diri pangani basang nagsusuwak
Diri pa basang ngani namumurak
Tinugpaan na ko mga saday na uwak.
Inubos, sinalvage ...tinigbak.


Lang erak man baga si Tatang
Da na ngani ginagatang
Da na ngani a bubugasan butang
Da pa nagpapa-utang, da pa maaani basang.


La na kalugi sa binhi
Uda pa aning mababawi
Mga utang pa sa abonong sinoble
Paano na raw mababayadan ka pobre.


Gobyernong da basang tabang
Mag ablada baga ag kaambugan
Ka mga proyektong sinra man a kikinabang.
Paryas ka mga buwayang-aswang.

Mina Magmanso

A damulag na mailyas
Rakpon ta!
Darahon sa malapok!
Darahon sa tubigan!
Lunadan ta,
Mina mansuhon ta!


Lang ilyas!
Biyong nag-uulakbo!
Biyong nagtatalon-talon!
Kapot sa maray ta maulog ka!
O kaya pagnaulog ka kumapot sa buntot!



Sa una malang isdol!
Malang iwag, biyong natataranta a damulag!
Biyong nagdudulag!
Gustong itikrag kitang mga nakalunad!
Pero pag napagal,diri na nag-iiwag!



Mina! Mamuyang magmanso.
Yehey! Manso na ding damulag
Lang buot ng lunadan!
Diri na nagdudulag!
Buko ng mailyas!

Tikdol!

Tukdol! Tukdol! Tukdol!
Mina panik kitang puon santol,
Ta a inog la na kadakol
Mga gurong-gurong pati na diri nasasapol.


Dugkol! Dugkol! Dugkol!
Naka-amba sa sangang santol
Mga antik na laka-dakul.
Bantay sa inog na santol na abong magpasapol.


Tikdol! Tikdol! Tikdol!
Mga bituon na malaka-dakul.
A tiil na biyo nang naggagatol
Diri pag-intindiha ta uda pay ka nasasapol!

Tukdol! Tukdol! Tukdol!
Tama na raw magparapanukdol!
Ta da man kita nasasapol.
Maray pang mag-igos tanganing di mamasol!

jomark m. baynado 12/17/2010