Batalan

Mantang kami nagpupungak-pungak
sa sadiri namong bag-ot ag luwa
ag pagurogatikat  na nauutsan sa kapagalan
pero  ta adi sinasalunga a disgrasya
nanganganap karagting na ibubuway sa pamilya
Di na ngani nakabubusog ka uda tam-is na kape
pero di pa ninggayod ninyo kami narurungog.

Sa examination room

mig-kagaw sa payo
gana kinukuto
migsilong sa kaabay
pero buko sa lalawgon
buko sa payo
miglaba a liog
migdakulo a mata
pirit na agko binababayad
binabasa
bumabalik sa dating ula
sagin mig paswit
dagos migsilong a sa atop ko room
agko inaanap sa mga sapot sa lawa
sa gutak na paril
umiisdol utro
sagin migtindog
uusayon su pantalon
pero arayo su naabot ko panilong
mig-ula na
ta sadto segundong adto
naanap na su kasimbagan ku ngamin na unga.

Libway

Lumibway ka rawitdawit
Iluwas mo a isog, ipabayad a kusog.
Umibay ka sa tapsak ka alon
Umibay ka sa pagsulog
Umibay ka sa karawkasaw
Umibay ka sa burokbusok
Umibay ka pumunggal
Umibay kang rumumpag
sa salang pangpang.
Tanganing ngamin maging usad
ag usad maging ngamin.
Lumibway rawitdawit!
Lumibway ka!

Prosopagnosia

Aram ko a kurba ka awak mo
A laba ka bok mo ag a ib-og kiton
lalo kun linulupad sa angin.
Isi ko pirmi mong sinusupong
A kulay na gusto....pula, asul, puti ....
A paborito mong ambag pag ika migloog eskwelan
A tsinelas mo na minsan burubognot lalo na kun malapok
Ngmin an isi ko.


Isi ko a natural mong parong
Isi ko lakang mo kaya dawa arayo isi kong ika yan
Tuom ko man a tindogon mo
Lalo na pag sa irarom ka  lindong ku mangga
Na ulatan ta.
Isi ko kun paano'y  ka maogma ag maudit.
Kaya piglilikayan ko su mga bagay na abu mo.


Pero ngata?
Ngata diri tay ka nabibisto?