inangos

an mga inangos na nadadangog sa kadikluman kan banggi.....
mate nin siram asin pagtios
kan mga aninipot asin mga lukton
na sa mga kahuy nin kadlagan
nagtataragu-taguan........

Matakot

pag nay para uran tapos nay para tagiti....
an mga kapre ag whitie lady nagigirukan
sa poon ka akasya sa kasentrohan
na naka-ampang pa sa lumang simbahan
ag nakatalukbong sa sasaudan
a mga pugot nay ruluwas
kaya kamo diri magruluwas
an mga tikbalang ag mga unglo
sa ugat kan poon akasya nakaukro
an matulis na kuko ag pangil
na sa rugo ag puso nanggigil.....


a mga santelmo sa gab-ing mangitngit
kalag na nagpapasabot, nagngingirit
kaya kamo mga igin magkatarakot
kaya kamo magtarago tanganing diri masaklot
o magakos ka mga nag-aaging pugot



matakot kamoooooo..........
matakoooooooot........
matakoooooooot........
matacooooooong........
matacooooooong........
matacon!

Haen na kamo mga raprap

Dakul sinda kan poon
Pero saro-sarong naragrag an mga dahun.
Naragrag.....rinagrag kan panahon.

Haen na kamo mga rap-rap?
Haen na an pulang burak?
Haen na an pisog na matugas
Na uminiinit pag kinakaskas?


Haen na an tusok-tusok ninyong maitom?
Haen na an ugbos na masiram gulayon?
Haen na an sadit na gamgam na pula
Na nakatugpa sa saimong sanga?


Haen na an saimong sanga
Na pag-ginatong minaaso sana?
Wara na! wara na.....
Naragrag na! naragrag na....


Pati poon mo nalapa na...
O panahon siisay an babasulon ta?
An pagtaas kan temperatura
O an batang an tawo pirming dara-dara?

Wara na

Sarong tanog an nan bulahaw
Sa kasiraman kan pagturog
Tanog-tambol
tanog-trumpeta nin pagmundo
Tanog kan paglakaw kan ga paag pasiring duman.....
Duman kun haen maatod
Nin Awak sa lulubngan
Kasabay kan pagkurahaw
Kan inang nakukulugan
Ngata siya pa....ngata siya.....tangis niya...
Nagtarangisan an gabos....
Wara na....
Wara na....
Wara na.... an sa iyang aki

Watawat

bagat sadi.....bagat sadto
guyod guyod sako
raruging iwawatawat ko....


sa plinantsang lapuk
a tiil nagtatalbong
mati a kalumukan
mati a kapagalan



bag-ot nagtuturo
sa lalawgon, sa likod, sa ngamin na awak
habang a saldang inaaarak

Ragpa

mga bunot na inanod
mga agod.....
mga tsinelas na uda kaparis.....
mga styrofoam ngamin sinda suminogod
sadto kabab-an
tinaluban so paruy
linantupan so mga kamalig
linigis so mga kababatagan
linumos so balingoy ag bungkokan



mga kawuy na nabuwal
buminalandra dawa saring gilid
mga ugat, nangawit-kawit...
mga lata, mga boteng bilog ag pusa
ngamin sinda suminugod sadto kabab-an
linantupan ngamin na tanom..
ngamin linumos uda pinatawd

Dakulong Sulong

dakulong sulong, harayo...
harayo sa kababaluyan.....
pero naaabot kan sagwan....
naabot kan maigos na lakaw....


sa awit kan mga sarak-sarak
ika maogmang salagan
salagan nin pagkamoot
sa ogot asin layagan.


sa agas asin katatambuan
an isura mo dakulong yaman
mga tulya mo dakulaon
mga bibeng masiramon.....


dakulong sulong, harayo...
harayo sa kababaluyan.....
pero naaabot kan sagwan....
naabot kan maigos na lakaw....

Palo

palo....
gakudan sa damulag, kanding, ag baka
palong pinalpal tanganing makatalbong
makatadyok.......
diri mabubugnot.....
diri magagabot


palong kinaptan ko sa mauban na panahon
palong pinatulis ko, ko sundang....
palong pinili ko sa mga kawayan....
tulid.....
matibay....
matanos....



pag miglawig pirming dara-dara.....
pag miglalin pirming dadarahon.....
palong pinayaba ko na
paryas ka pagpayaba ko ko mga ataman namo...
palong nakatatak na sa utok ko
inaanod na sa ugat ko......
kasabay ka pagpitik ka pulso ko......


sana a mga tawo nagin palo
pirming nakatadyok.....
pirmig matibay.....
diri magagabot....
diri mauuda......
ako kaya nagi nang palo
ta itinadyok ko na a sadiri ko sa ragang ini.....
sadi ragang ini na ko malullupa
diri na ko sadi magagabot....

Ki Revale

nagin saksi an maagnaw na tubig nin sulong ki revale
sa saimong pagdakula......
sa saimong pagtalubo......


sa aro-aldaw na pagbisita ninyo kaidto
tanganing malabhan an maaating bado
natuom mo na an mga aba asin agihan
an mga liko asin susurukan....


dawa anong gabat kan plangana asin babrasan
kinaya mo .....
marikas an saimong lakaw
tanganing maludop mo an sulong
asin matan-aw an urag nin paglangoy
asin pagrurip kan saimong mga tugang.


pinanik mo an mga kahoy nin atipolo
asin ninamitan mo an hamis kan bunga kaini....
binukday mo an tulang
asin niluto mo an siram kan buhay-aki.....


binalyo mo man an sulong ki revale
asin sinalunga an agos kaini
asin pinurbaran mong abuton kan saimong kamot
an kararoman....
binuklat mo an saimong mata sa irarom kan tubig
asin nahiling mo an gayon kan irarom kan sulong.



inupog mo an mga sira
asin kinapkap an mga bibe
na nagtatago sa bato asin baybay....


ini an buhay ki revale
ini an ogma asin katrangkiluhan
ini an paglaom kaidtong kapanahonan
na sa memorya na sana babalikan......

Sapatos na lubot

sa pagtapsak mo sa labot-labot na agihan
luway -luway na luminaog an tubig
sa labot na sadit
asin sinupsup kan tela an tubig
nalamos an saimong paa!!!

mati an basa pero dai pwedeng tangkason
ta maulok an makahihiling
mapapasupog ka.....
sige tiosa....sige tiosa..


gusto mo man na pamarahon
pero nag-aburido an init
asin pig-paasa ka......pig-paasa ka.....


nangadyi ka na pumundo na sa paghibi an maitom na panganoron
salamat naherak sa imo
dinangog ka....dinangog ka

Sentro

sa kabitngaan ka mga uma
ako a sentro ka kinaban
suminasaludo kanako ngamin na bulod
tuminatan-aw, suminisilong
ako a piguukruan ka mga inog na paroy...
inaawitan ako ka mga bayong
pinapamuya ako ka mga costa, rignos, talaod, balinsasayaw....
ngamin sinda naglalayog
ngamin sinda nagkakanta kan kamuyahan.....

Ika

Sinurat mo sa dahon kan panahon an saimong istorya
An saimong pagkamoot.......
An saimong paglaom.....


Binasa mo sa ragasa kan alon an tunay na kahulugan kan buhay
An pag-ogma asin pagmundo...
An pag-ulok asin pagtangis.....


Luminuhod ka sa gabat kan saimong dara-dara
Asin dinangog asin saimong awit....


Rinurip mo sa ranaw an tunay na paghigos
Asin nakua mo an Gloriamaris....
An saimong bag-ot nilunadan mo
Tanganing maabot mo kun ano ika ngunian....


Asin sa pagbulos kan saimong luha
Inanod an gabos mong takot
Asin ika naging ika kun ano ika ngunian.....

Takot

an daguldol asin an kitkilat nagpapamati........
nananakot sa mga sadit na kabute
na nagtalubo sa balisbisan kan bulod.....

an duros asin maitom na panganoron
garo mga eksenang nagbabalik-balik......
sa mga matang nakapirong na nag-aawit nin paglaom......


an patak kan uran
Mga bangungot na haloy nang gustong lingawan.....
Pero garo mantsang nakadukot sa puso asin isip nin tawo.....


an maitom na tubig garo demonyong ngirit
nagtataong kadikluman sa paghiling
mga tusok asin sapak na dai maaraman kun saen naghali...

an daguldol asin an kitkilat nagpapamati........
nananakot sa mga sadit na kabute na nagtalubo sa balisbisan kan bulod.....
an duros asin maitom na panganoron garo mga eksenang nagbabalik-balik......
sa mga matang nakapirong na nag-aawit in paglaom......

Inanod na

Sa pagragasa kan alon inanod an sa iyang pangaturugan..........
Inananod an saiyang paglaom.......
Inanod gabos.....


Kaidto maliwanagon an saiyang lalawgon........
Dakulon an saiyang plano.......
Pirmi siyang nakangirit.....


Pero ngunian nagdukot an saiyang ngimot......
Dai nang silyab nin kaogmahan an saiyang mata.....
Mayo na an saiyang pagmate....


Nawara an sirang kan aldao sa saiyang buhay.....
Gabos kadikluman, gabos nalingawan.....
sarong bangungot....


An kagayunan wara na
Dawa ihampamg mo saiya sa hardin nin rosa
Dawa itao mo saiya an ribong ginhawa...


Sa pagragasa kan alon inanod an sa iyang pangaturugan..........
Inananod an saiyang paglaom.......
Inanod gabos.....

Compleaño

nagralayugan an mga lobo...
nagrukyaw an mga gamgam
Nagoogma sa saimong pagdatung....


maogma an lalawgon kan saimong gurang
ulok nin tunay na kaogmahan
ulok kan tunay na pagkamoot......


an mga ambon na inaplas sa tuhod mo
kan panahon na ika sadit pa
saldang ni paglaom na matalubo ka.


ngunian ika sarong marhay na ehemplo
sa mga tugang mo
madya ta mag-ogma ta compleaño mo....

An brang nawawara...

Nagkaribok an gabos!
Nagoroontot an boses
Sa mga ringring kan kabaluyan
Nakigkig an mga kuraratsa
Asin natakot an mga butiki
Na nakadukot sa kisame!
Hinanap sa lalabahan ....
Inula an butang pero wara....
Wara duman....
Binuksan an aparador
Winagwag an laog,
kinalkal.....
Sinirang.....
Pero wara, wara, wara!
Nagkurahaw sa pagkauyam,
Naghapot kung nalabhan o nahiling man lamang....
Namula an talinga...
An utok maputok na!
Garo kwitis na igwa ng silyab o kalayo
Na dawa anong oras masabog
Pero wara, wara, wara talaga!
Nagduman sa sampayan.....
Sinaro-saro an mga nakasampay
Hinanap sa mga nakahanger
Asin sa mga nakaipit
Pero wara, wara, wara!
Wara duman an brang hinahanap!

Turugmasi

Sa maagang-ang na mudto
Rinakop mo ding malsok ko!
A pakpak mong makkintab
Pasaling magayon....


Tugpa sa dahon mangga
Tugpa sa lukoy!
Layog paiyan kayo.
Layog paiyan kanako.
Ogma ding puso,
Ogma ding mata ko!

Cellphone

Kinakaon mo a oras ko.....
Kaya uda ako natatapos,
Pag-ika nagtunog,
Binabayaan ko a ginigibo ko....pipindoton..


Minsan sa kabitngaan ka pagklase
Migtunog ika!!
Kirilingan so mga kaklase ko
Ki isay adto unga sa mata nira.
Ngamin sinra nakasilong kanako.


Si sir ag si madam
Udit ta iba a inaatman ko...
Diri kaya kuno ko nagrurungog sa itinututuro ninra.


Ika kaya nagparatunog....
Kay pigpipindot tay ka!!

Sa katatambuan

Linawig ko ding ataman
Sa marambong na dootan
Pagkaramrag saka ko binalikan
Tanganing ilalin naman.


Ay! Sari na ka nagliwalliw
Ta siguradong ika nakabiliw
Ta nawatak na sana so pisi mo ag palo.
Sari na baya ika naglalalao?


Sinundan ko so gira mo
Pasurok sa katatambuan.
Surok sadi.....surok sadto....
Amo di pigparagibo ko
Sa pagparaanap kanimo....

Ko maanap tay ka
So mata mo biyong namuya
Ta tadi na ako
Na miginabod kanimo.


So kapagalan ko nauda na
So kauditan ko napura na
Paryas kitang namuya
Paluwas sa katatambuang nagib-ugan na

ballerina

Sa stage talon talon na......
nakabayad kayang kuraratasa.....
burubayli na .....
uno nagpapansin ka.....
toog man a awak mo
gana baga bakal a kaipuhan tistison....


pigpapalayog mo nam a kamot
pero uda basang siram....
Uno yan salag Intermission Number man....

Araka-ak

Araka-ak ika.....
Lang gatol.....lang sanit....
Lang apri......lang kulog.....

Dawa diri ika pig-uuno.....
Pero ika nanguuno....
Nakiagi man sana ko.....
Pero kinulgan mo ....
Pig pabura mo ko....
Gusto mo kaya akong magtanagis.....


Bayda ding kulit ko malang pula....
Halos magrugo na.....
Ginusgus ko nang asin
Pero a kulog siton pa....


Araka-ak ika.......
Nangungulog! naman sabihon mo self-defense
Ngata pig kukulugan tay ka....?
Diri man baga!!!!!

Pagmate sa purongputungan

Mamuya ta nababayad ngamin
Ako a pinakaalangkaw.......halos maabot ko na a langit
Abot ko a mga panganoron...
Halos makisan ko na a mga bitoon.....
Lang muya ta solo sana ako sadi
Tapos ngamin sinda nakatangad kanako....
Pig-iibugan......


Amu ko una lang muya pero nguwan na nag-uuban
Buko man palan mamuya
Lang takot palan....
Lang takot na maulog ta siguradong mapupulsag ako
Mawawasak a tulang ko migkababarian ako na baka di na ko makabuwat.....
lang takot ta biyo akong pigbuburobayli ka angin.....
Pig-ngingisyan man ako ka mg bayong ag kulalapnit....
tapos pigpapangadyi ka maga nakatangad kanako na sana matikrag na ko...