pagbabalik

makikita mo
ang mga bundok
ang mga burol,
ang palayan,
ang langit....
ang langaylangayan
at ang mga balinsayawang nasa kawad
lahat bumabati sa iyo

makikita mo
ang mga poste ng kuryente,
ang nagtatataasang tower
ang mga batang kargador
ang mamang namamalimos
ang baliw
at ang mga  nagbabaliw-baliwan
nag-aabang silang lahat sa iyong pagbabalik

makikita mo  ang mga gusali,
abandonado,
kalansay,
wasak,
pinturado,
mababa,
at yaong inaabot ang langit.

madadaanan mo ang mga bulaklak
subalit di iyon ngingiti.
madadaanan mo kalabaw na sakay
ang mag-ama
marahil pauwi na mula sa tumana..


madidinig mo ang pulpito ng simbahan,
ang pep! pep! ng sasakyan,
ang mga ugong ng motorsiklo,
ahh...wala kang  maintindihan
naghahalo ang  lahat ng ingay


maririnig mo ang iyak
ng ibong naliligaw
naiwanang mag-isa
makikita  mo silang lahat
maririnig
subalit di ka nila mapapansin....

sa pagbaba mo sa bus
sasalubungin ka ng iyong inang
nakaitim at umiiyak
at sa garagal na tinig
bibigkasing ......
"wala na  siya.....
wala na ang iyong ama"...