Kahirapan

Kahirapan
Ito ay amoy ng pusali
Taghoy ng ibong nalalagalag
Kudkud ng kutsara sa kalderong walang laman
Pagmamakaawa ng mga kalapating di makalipad
Pagbagsak ng mga yero at dingding sa eskwater na denimolish
Sigaw ng mga raliyesta humihiga sa kalsada
Pakiusap ng batang humihingi  ng barya
Kaluskus sa basurahan
Uha ng munting sanggol na iniwan sa CR
Patak ng luha ng pagpapabusabos sa ibang bayan
Suicide note ng  natanggal sa trabaho
Kalansing ng baryang sweldo
Na naglimlim pa bangko
Habang libong bata tiyan ang sapu-sapo
Ito ay bulong ng sikmurang kumakalam
At panis na laway
Ito ay kalyo ng palad
Putik sa mukha
Amoy ng basura
Dikit-dikit na bahay
Huni ng bubuwit, ipis, askal, pusakal
At pasang krus ng marami.