rawitdawit

agbaan

Sa kaababaan

ka paglayog

Masakit

kang rakpon,

abuton.

A purong-putungan

di mo pa

natung-tungngan

pero bilog na

a kamuyahan

mo.

Binalanse

a kagayunan

miy

kapakumbabaan

siton

kupad

ka pakpak mo .

tuom ta pay ka

Tuom ta pa man ka
Dawa ika nauda na
Burak mu ngani pula
Bayong na rignos kaparyo baga.

Ugbos mong masiram
Pisog mong nag-iinit
Pag kinikiskis sa paril
Awak mong agko tudok na itom
Puruputungan na sinalagan sa malapaga
Pag sanga mo nalalaya
ag ginagatong
Unimaaso sana
Awak mong malumok
Madaling malupa
Istaran ulalo
Kinukotkot namo
Tuom pa man ka raprap
dawa ika nauda na......


sa saimog pagkarungaw

sa saimong pagkarungaw

nagdiklom an kalangitan

asin an gabos nangobogkobog

nagkatarakot...

narugma an gabos na nakatindog

luway-luway na naranggang

an dalan na tama

asin ika naglalataw-lataw  sa dagat

kan saimonmg pagakarungaw....

Dai mo masabot

kun ano an matanos

ta sinakbatan ika kan saimong hadit....

nagluludab an saimong mata

namamaso........

sa mga dalan ika nag-aagi-agi

na huba

an naghahanap

kan saimong sadiring nawara

baad sa doot asin basura

mahiling mo an saimong repleksyon .....

asin matakot ka sa saimong pagkarungaw....

kumpisal

nguwan na gab-i
sasabihon ko ngamin kong tago-tago
ngamin ko iluluwas
da ako itutuda
ta gusto kong mabisto mo ako sa maray
tanganing da ika iisipon
na maraot kun ako nakatalikod.....


mudto na

nagpaingalo na su paratataho

nakiula na su naglalakong banig

naki-inom sa tubig su parasasad

namayid bag-ot su paratitindang mani

mudto na! sari pwedeng magkaon

na agko tubig na maagnaw

ta lang init kading panahon...

nakikisabay a init sa lapnit kan buhay...

burak na nakaukrong


burak siyang magayon
kapareho gayo ka kogon
luminalayog
sa uyop ka angin na makusog
ag arayo a  naiiyanan
linulupadan dawa uda man
makusog na pakpak na panlaban sa angin
maamot siyang gayo ag magayon
pero sa  pag-agi ka panahon
buminalik siyang naka-ukrong
ta burak siyang kogon
na natikrag sa nagbabagang pugon...




an oras

an oras haluyon

pag igwang hinahalat

kun pwedeg ibusol

an kamot kan relo

tanganing madaling umalas kwatro

asin maheling na

an kamuyahan kan buhay

an kinukurahaw kan puso

an lalawgon na rinururum

kun bangging sulo-sulo...

pero batogon na maray

kun warang ginigibo

lalo kun gustong dulagan

an kulog na dara kan pagkamoot

an panahon na nagbuburubwelta

sa mata pag ipinipirong

an ga oras asin minuto

na mamuya kaidto

na naging bagungt ngunyan..

 Hahanapon ta ka

Dadalaganon ko an kabubuludan

Susurukon  an kabubukidan

Rururipon an katubigan

Hahanapon ta ka, sain ka man.

Hahanapon ta ka sa puso kan kadagatan

Aaraduhon ta ka  sa kadagaan

Sa saru-saruon an kababatagan

Uukayon ta ka sa kalubluban.

Pag nahanap ta ka,

Matuturog ako sa saimong daghan

Asin ako magtatalubo diyan

Ta sa  lindong kan saimong pag-ataman.

Wara an takot asin  kariribukan.

Wara an gabos, kundi katrangkiluhan

Warang paghibi puro kaogmahan

Warang hadit puro paglaom

Kaya ika sakuyang hahanapon sain ka man.