Sa inyong paglipad....

Bakit kailangan pang magpalit-anyo?
Bakit kailangan pang lumayo?
Kay lungkot naman na kayo'y lilisan
Kami sana'y huwag nyong kalilimutan.

Sa inyong paglipad sa kaitaasan.
Dalangin namin ang inyong kaligtasan
Nawa'y magtagumpay kayo sa alapaap
Nawa'y matikman ninyo ang tamis ng pangarap

Ingat kayo sa mga sagwil sa daan
At kung kayo ay madapa sa pag-iyak-tumahan
Tumayo at muling kumampay
At lasapin ang alindog ng buhay


Kung sa inyong paglipad
Sa bangis ng buhay doon kayo maipadpad
Maghinanakit sa Diyos ay huwag
Harapin ito at huwag maging duwag.



Tandaan na saan mang bahagi ng mundo
Ay may isang bukod-tanging paraiso
Na tanging hinihintay ay kayo
Pagkat handog ito ng maylikha sa inyo.


Kung ang pagkapakpak ninyo
Ang kalooban ng maylikha sa inyo
Sige humayo kayo
Sige lumipad kayo!