Walang kasalanan ngunit ikinulong
Sa isang hawlang ang bangis ay kandong
Sa bawat umagang panaghoy ay bulong
Atungal ng hayop sa libingang kanlong.
Sa'yo kadiliman taghoy at panangis
Kakambal ko wari pusong nanangis
O! takot at luha sa isip binigkis
Sa bawat pagdaan ng punglong mabangis.
Sa bawat umagang hanging malinis
Ibinibilad ang mga kaululuwang yapis
Imaheng balakyot sa matang walang hapis
Kaluluwang sibol sa hawlang marungis.
Tanikala'y pigtas, pintuan ay bukas
O! malaya na malaya ng lumabas
Ngunit dangal ay sira, katauha'y baklas
May umaga pa ba na maaliwalas.
No comments:
Post a Comment