pagkagutom

Pagkagutom, ini sarong helang
Sana dai kamo tamaan
Ta dai ini napupugulan.

Sarong aking tios
An nagbarungkal sa kaldero
Sinirot an tadang itip
Tangani sanang mabulong an pagkulog kan tulak.
Sabay inom ki tubig tanganing mabasog.

Pagkagutom, ini sarong helang
Sana dai kamo tamaan
Ta dai ini napupugulan.

Sarong pulitikong mayamanon
An nagtukaw sa saiyang primera klaseng tukawan
Asin pinirmahan an mandamiento
Na dapat siyang bistuhan asin katakutan
Ta siya na an diyos ngunian
Siya na an diyos na sasambahon kan mga butang uripon.

Pagkagutom, ini sarong helang
Sana dai kamo tamaan
Ta dai ini napupugulan.

Sarong babayi
An marikas na huminadok
Sa gurang na lalaki
Na an alahas nagkakawil-kawil sa li-og.
Luminaog sinda sa hotel..... kun ano an ginibo dai mi na aram.
Pero an kabalyo kaidto kwarta asin bulawan.

Pagkagutom, ini sarong helang
Sana dai kamo tamaan
Ta dai ini napupugulan.